NUN HI KRISTA (TO LIVE IS CHRIST) (Phil 1:21)

NUN HI KRISTA (TO LIVE IS CHRIST) (Phil 1:21)

- R. Lalhruaitluanga,

 

“Kei atan zawng nun hi Krista a ni si a, thih pawh hlawkna a ni” 

(Phil 1:21).

 Mi tam zawkte chuan a chang tawp lam “thih pawh hlawkna” tih lam zawng hi an la khawm a, tichuan, vanram nawmna leh hlimna te chauhvah an bel thin a. Mahse a hmaa thil awm hi kan hmuhhmaih tur a ni lo. “Nun hi Krista” tih \awng kam khat pawimawhna pawh hi kan sawi uar lua thei bik lovang. Phil 1:21 thu hi kristian nun kawng zawng zawnga hmun laili a kan dah thiam chu a ngai hle ang.
Chuan, Phil 1:21 thua Mizo Bible-in “NUN” ti a a dah hi NUNNA (life, noun) a ni lo va; “NUNG or NUN” (live, verb) a ni tih kan hriat a tha hle ang. Engti anga NUN (how to live) nge, tih lam a kawk a. Duh duh dana inthlahdah taka kan awm lai pawn ka NUNNA (life) chu Krista tho a ni tih lam hi min zirtir tum a ni lo va. Krista nunna nei tawhten mahni duh dan dana nung tawh lo a, min neitu leh kan nun thar neih anga “eng tia nung (how to live with..) tur nge kan nih” tih sawina lam zawk a ni.
He thuah hian tirhkoh Paula chuan “eng kim nih a tum tawh te, a nih mekna te, leh hma lam hun a thlirna zawng zawngah Kristaah a tinzawn vek a. Paulan heng thu a sawi hun lai atanga a martyr ni thleng hian engkim a tihnaah Krista hriatna te, chanchintha te, leh Krista kohhran lam chauh a tinzawn a. Paulan thil pakhat chauh a tum tlat chu “Krista ropuina” thlentir zel hi a ni.
“Nun hi Krista” (To live is Christ) tih awmzia chuan Krista chanchintha puanzar (proclaim) na lam hi a kawk tel bawk a. Paulan synagogue-ah te; lui kam velah te; lung in tang chung te-in; tirhkoh ang te-in; puan in siamtu ang te-in chanchin\ha a hril a. A thuchah sawi erawh a dang lam chuang lo: “Isua Krista, amah ngei khenbehna thu chauh” (1 Kor 2:2). Krista inhlanna thuchah chu lal te, sipai te, ram roreltu te, puithiam te, mifing (philosophers) te, Juda-te leh Gentile-te, mipa-te leh hmeichhia-te hnenah a thlenpui a. A ngaithlatu tur an awmna apiangah a sawi zel thin ni berin a lang. “Thu chu hril rawh; a hunah te, a hun lovah te pawh bei zel rawh; dawh thei taka zirtir chungin an thiam loh hriattir la, zilh la, fuih rawh” (2Tim 4:2).
“Nun hi Krista” tih awmzia chu Krista’n entawn tur min hnut chhiahte anga nun-na a ni a. Paulan sawi leh tih a duh thin, Isua sawi ang leh thiltih te anga ringtute nun dan (the way of the believers’ living) hi a ni a. Pathian a ngaihsakna hi Krista kohhrante entawn atan a duhsak em em a: “Mi zirtute ni rawh u, kei pawh Krista zirtu ka ni ang bawk hian (1 Kor 11:1). Isuan eng nge a tih ang? Chu chu a lawm tih kan duh \hin chu: nun tak neituten!

“Nun hi Krista” tih awmzia chu Krista hriatna (knowledge of Christ) kan chhuia kan zawng reng hi a ni tihna a ni a. Nun nei tak taktute chuan Krista chu ni tinin hriatfiah deuh deuh chakin kan ngaihven \hin. Mite nun a Krista hmel hmuh tum lovin mahni nun ngeiah kan hmufiah hmasa thin a, tichuan, miten kan nunah an hmufiah thin. Isua Krista thu peng khat lek ni lovin amah Krista ngei hi a ni zawk bawk a. “...a thihna anpuia thiin, amah nen, a thawhlehna thiltihtheihna nen, a tuarnate tawmpuina nen ka hriat theih nan; mitthi zing ata thawhlehna chu ka chang thei hram mahna, tiin” (Phil 3:10-11).
“Nun hi Krista” tih awmzia chu Krista chauh kan neih chhun a nih theihna tur daltu, kan vawn lai thil apiangte kan thlah phal \hin tihna a ni. He thu a Paula testimony chu: “Nimahsela, ka tana hlawkna tur apiangte chu chung chu Krista avangin channaah ka ruat ta a ni. A ni tak meuh mai, ka Lalpa Krista Isua hriatna ropui bikzia avangin thil engkim pawh channaah ka ruat a ni; amah avangin thil zawng zawng ka chan ta vek a, chung chu hnawmhneah lek ka ngai a, Krista ka hmuh theihna tur leh, mahni felna (Dana felna chu) nei lovin, Krista rin avanga felna (rin avanga Pathian laka felna chu) nei zawkin, amaha awm ka lo nih theihna turin” (Phil 3:7-9). Isua avanga kan inhlan ralna chu a let tam taka hmu leh tur kan ni tih kan Lalpa thu tiamah kan bei tlat \hin. Isua chuan, “Tih tak meuhvin ka hrilh a che u, tupawh keimah avang leh Chanchintha avanga in emaw, unaupate emaw, farnute emaw, nu emaw, pa emaw, fate emaw, ramte emaw kalsan tawh phawt chu, tun dam chhung la la hian, inte, unaupate, farnute, nute, fate, ramte a leh zain, tihduhdahnate nen, hmu lo tur tumah an awm lo; hun lo la thleng tura chatuana nunna nen” (Marka 10:29-30).
“Nun hi Krista” tih awmzia chu Krista hi kan engkim infinkhawmna (focus), kan tum (goal), leh kan duhzawng ber (our chief desire) a ni tihna a ni. Krista chu kan rilru leh thinlung, kan taksa leh ka nunna (soul) leh kan ngaihtuahna engkim te “center point” a ni a. Engkim kan tih hi Krista ropui nan chauhva ti kan ni thin. Kan hmaa intlansiaknaa kan tlan lai hian Isua lam chauh enin min tihnawktu apiang kan dah tha thin (Heb 12:1-2). Amah hi kan NUNNA a ni si a.